Oficiala Gazeto (OG) ja ekzistas kiel Guglo-libro, sed praktike tio estas nehelpa, ĉar la pecetoj montritaj ĉe la ekrano estas tiel malgrandaj, ke ofte ne eblas kompreni la kuntekston. La zorge faritaj indeksoj kronologiaj kaj laŭtemaj nun ebligas rapidan superrigardon pri la enhavo. Mallonga priskribo de la gazeto kompletigas la informojn.

OG i.a. estis la oficiala organo de la Lingva Komitato kaj de la Akademio de Esperanto. Raportoj pri iliaj laboroj oni trovas en tri kategorioj: oficialaj decidoj, preparaj dokumentoj kaj privataj verkoj. Tie ĉi oni trovas multajn el la "eternaj" prilingvaj diskutoj de Esperanto, kiujn ĉiu generacio de novaj esperantistoj denove "malkovras", vd. ekzemple nur:
  • Pri la participo-substantivo.
  • Pri la nomoj de landoj.
  • "Okupita" aŭ "okupata"?
  • Pri akuzativo post "anstataŭ"
  • Materialoj kaj rimarkoj por helpi al kritika esplorado de la esperanta vortaro
  • Pri la naciaj tradukoj en la Universala Vortaro
  • ktp. ktp.
OG krome servis kiel centra informilo pri la fruaj Universalaj Kongresoj kaj tiu-rilate ankoraŭ estas valora por historiistoj.

Fine al ĝi estis kunkrampita dum kelkaj antaŭmilitaj jaroj la organo de Esperanta Verkista Asocio (EVA) kun prijuĝoj de fruaj literaturaĵoj (tiun aspekton la priskribo ne mencias).

Eĉ se la indeksoj de Biblioteko Sebert ne anstataŭigas rektan legadon antaŭ la ekrano, ili sendube estas gravaj kaj bonvenaj helpiloj por doni impreson pri unu el la plej gravaj historiaj gazetoj internaciaj al nuntempaj interesitoj lingvaj kaj movad-historiaj. Bravo!

------

Mi dankas al Rolando pro lia atentigo pri tiu retejo.