- Palestinaj teroristoj pafis raketojn kaj grenadojn el la Gaza-strio en Israelon ekde jaro 2000.
- Ekde jaro 2001 ĝis januaro 2009 pli ol 8600 raketoj estis pafataj. Tio estas 8600 malobservoj de la homaj rajtoj.
- Sderot estas urbo kiu grave suferis de la terorismo. Dek tri loĝantoj estis mortigitaj kaj centoj estis vunditaj.
- Ekde la mezo de junio 2007 al la mezo de februaro 2008, 771 raketoj kaj 857 grenadoj estis pafataj en Sderoton kaj la okcidentan Negevon, meznombre po tri aŭ kvar tage.
- La registaro de Israelo establis alarmsistemon kiu avertas la loĝantojn pri raketoj. Post la alarmo oni en Sderot havas nur 15 sekundojn por atingi ŝirmilon.
- En majo 2007 signifa kresko de la atakoj kaŭzis ke oni evakuis milojn da loĝantoj.
- Domoj kaj hejmoj en Israelo normale estas provizitaj per bombŝirmiloj. Tio klarigas la relative malaltan nombron de mortintoj kaj vunditoj.
- En marto 2008 la registaro de Israelo metis 120 fortikigitajn bushaltejojn sur la stratojn en Sderot.
- La teroristoj ĉefe atakis kiam la infanoj iris al la lernejo en la mateno kaj kiam ili reiris hejmen posttagmeze.
- Pro la daŭra minaco de raketatakoj ĉiuj lernejoj estis fortikigitaj.
- La daŭra pafado de 8600 raketoj ne vekis multe da atento en la amaskomunikiloj tra la mondo.
- Israelo klopodis solvi la problemojn diplomatie. Ekzemple estis dekduo da leteroj senditaj al UN.
- Ĉiu lando havas la rajton kaj la devon defendi siajn civitanojn – ankaŭ Israelo.
- Dum la vintro 2008-2009 Israelo militis kontraŭ la teroristoj. Tiu ĉi milita operacio vekis multan atenton kaj ĝi estis vaste kritikata.
- Israelo estas sola kaj ignorata kiam ĝi estas atakata de raketoj, sed la tagon kiam la lando sin defendas la mondo vekiĝas por kritikado kaj juĝado. Israelon oni traktas maljuste kaj malegale.
Fontoj:
Vikipedio: Palestinian rocket attacks on Israel
Vikipedio: Sderot
The Operation in Gaza - Factual and Legal Aspects
Tiu ĉi afiŝo estas publikigita en tri lokoj samtempe: miajpripensadoj.wordpress.com, Esperanto.com kaj Ipernity. Listo de ĉiuj artikoloj.
"Nu, mi celis tion: mi legis ie ke ekzistas homoj laŭ kiuj, iuj historiaj dokumentoj kaj arĥeologiaj pruvoj pensigus, ke la nunaj judoj disaj en la mondo ne estus la praidoj de la antikvaj judoj de la antikva regno Israelo..."
Frenezaĵoj. Same sencerbe estus klopodi pruvi ke la italoj ne estas idoj de la praidoj en antikva Romio, aŭ ke la finnoj ne estus idoj de la prafinnoj.
"mia ŝtato estas la ŝtato de la popolo kiu loĝis ĉi tie antaŭ jarmiloj, kiu estas la popolo mia"
Nu, tiun principon oni aplikis dum la tuta homa historio kaj verŝajne oni aplikus ĝin dum longa tempo estonte.
Se la plejparto de la landoj sur la mondo aplikas tiun principon, kial do ne Israelo estus rajtigita fari tion? Nu vi, Andrea, certe dirus ke vi ankaŭ malporas la etnecon de ekz. eŭropaj landoj. Sed ĉu vi havas iajn planojn por la neetnecigo de tiuj landoj? Aŭ ĉu vi havas planojn nur por Israelo?
Laŭ mi la ĉefa sistemo tutmonda kaj ĉiutempa estas ke popoloj fondas ŝtatojn. Tamen multaj popoloj ne havas proprajn ŝtatojn, sed vivas kiel malplimultoj en ŝtatoj. Tiu sistemo estas laŭ mi tute bona, kondiĉe ke la malplimultanoj estas plenvaloraj civitanoj.
Laŭ mi - kiel mi jam antaŭe diris - estas tute pravigite ke troviĝas unu juda ŝtato en nia mondo, kiam troviĝas jam dudeko da kristanaj landoj kaj dudeko da muzulmanaj landoj.
Ne ekzistas iaj ajn priduboj de la ligiteco de la judoj al Israelo. La judoj starigis siajn ligojn al Israelo dum 3000 jaroj. Tiuj estas nenuligeblaj historiaj faktoj.
Israelo estas tute kaj plene pravigita ŝtato/lando. Tion ĉiuj akceptu - ankaŭ la najbaroj de Israelo.
La ligiteco de la judoj al Israelo estas eĉ memkomprenebla afero por iuj muzulmanoj!
Tiun komenton mi volas fini per la vortoj de Josef Ŝemer:
Por ke la legantoj komprenu min pli bone, jen vera rakonto. En la komenco de la 20a jarcento Ĥajim Weizmann, fama cionisma gvidanto, multe klopodis ĉe la lokaj politikistoj por akiri en Londono subtenon al la cionisma projekto. Demandis lin unu el la membroj de la Ĉambro de Lordoj: "Kial vi, judoj, insistas setli ĝuste en Palestino? Ĉu vi ne povas trovi pli oportunan lokon por krei vian ŝtaton?" Respondis Weizmann: "Tio estas sama, kiel se vi demandus min, kial mi veturis 20 mejlojn por viziti mian maljunan patrinon, dum en mia kvartalo loĝas kelkaj maljunaj virinoj viziteblaj ..."
En tiu ĉi debato vi, Andrea, insistas ke la radiko de la Israela-Palestina konflikto estas "la principo 'etneco' en la aranĝado politika de tiu mondoparto" (kaj kiel solvo vi proponas ŝtaton ununuran, radikale demokratian, laikan kaj sendiskriminacian).
Mi insistas ke la radiko de la Israela-Palestina konflikto estas "ke la malamikoj de Israelo ne akceptas ian ajn judan ĉeeston en la Mezoriento" (mian proponon al solvo mi prezentas pli sube).
Tiel mi kritikas la aserton ke la konflikto radikus el "la principo 'etneco' en la aranĝado politika de tiu mondoparto" (ĉiuj argumentoj eble ne aperis dum la debato):
*La konflikto ne povas esti kaŭzita de la principo 'etneco', ĉar tiu principo estas grandparte aplikita en la mondo, sed tamen ne kaŭzis tiel sangajn kaj longedaŭrajn konfliktojn en aliaj partoj de la mondo kiel la konflikto Israela-Palestina. (La Israela-Palestina konflikto do havas trajtojn kiujn aliaj konfliktoj ne havas; pluraj militoj kie la samaj landoj atakas la saman ununuran landon, sanga kaj besteca terorado, kiu estas sistemigita kaj celas specifan landon/popolon ktp.)
*La arabaj estroj estas tute konsciaj ke la judoj havas ligojn al la teritorio (tion konfirmas ankaŭ la libro de Morris). Tial ili devus akcepti judan ŝtaton kun rimarkinda araba loĝantaro en tiu ĉi lando, sed ne tion faras. Ĉu tio vere povas esti kaŭzita de la principo 'etneco'?
*La palestinaj araboj havis plurajn okazojn fondi propran ŝtaton (1937, 1939, 1947, 1948-1967, 1979, 1993, 2000, 2005) sed tion ne faris, sed rifuzis ĉiun okazon ĝis nun. Ĉu vere pro la principo 'etneco' en la aranĝado politika de tiu mondoparto? Ĉu iuj estroj vere farus tiaĵon en alia mondparto? Ĉu oni fakte povas rifuzi tiel bonajn proponojn, tiel multajn fojojn, se oni vere sincere volas krei ŝtaton por sia popolo?
*La plej peza argumento (kiu fakte laŭ mi tute povas faligi tiun aliron ke la konflikto estus kaŭzita de la principo 'etneco' en la aranĝado politika de tiu mondoparto) estas ke Israelo fakte igis la restintajn nejudojn plenvaloraj israelaj civitanoj. En la publika debato kaj en la amaskomunikiloj la rajtoj de la malplimultoj en Israelo estas ofte misprezentataj. Fakto estas ke la situacio de la israelaj nejudoj estas bona. (Malsimilaĵoj troviĝas kompreneble inter la nejudoj kaj la judoj, sed tiaj malsimilaĵoj troviĝas ankaŭ en aliaj landoj inter la plimulto kaj malplimulto, ekz. en lando kiel Francio koncerne araban malplimulton. Tio do ne estas io specifa por Israelo.)
*Arabaj estroj dum la historio plurfoje elbuŝigis vortojn pri ekstermado aŭ forviŝado de Israelo. Ĉu vere pro la principo 'etneco'? Ĉu tiaĵo iam okazis alie en la mondo, ke tiel multaj estroj tiel multaj fojoj minacis alian (pli malgrandan) landon pri ekstermado?
*Israelo spertis tre sangan kaj bestecan teroradon dum sia tuta historio, kaj precipe dum la lastaj du jardekoj. Ĉu vere pro la principo 'etneco'? Ĉu iu alia lando frontis tiel sistemigitan kaj sangan teroradon?
* Israelo frontis tri ege severajn militajn minacojn dum sia historio: 1948, 1967, 1973. La celo de tiuj militoj estis la ekstermado de la juda ŝtato. Tio estas sistemigita; la samaj landoj atakas la saman ununuran landon. Tiaĵo verŝajne neniam okazis en alia mondoparto. Ĉu vere pro la principo 'etneco'?
Tiel mi motivigas mian starpunkton (la konflikto radikas el tio ke la malamikoj de Israelo ne akceptas ian ajn judan ĉeeston en la Mezoriento):
*Arabaj estroj dum la historio plurfoje elbuŝigis vortojn pri ekstermado aŭ forviŝado de Israelo.
*Israelo spertis tre sangan kaj bestecan teroradon dum sia tuta historio, kaj precipe dum la lastaj du jardekoj. La ununura celo de la terorado estas ekstermi la judan ŝtaton.
*La palestinaj araboj havis plurajn okazojn fondi propran ŝtaton (1937, 1939, 1947, 1948-1967, 1979, 1993, 2000, 2005) sed tion ne faris, sed rifuzis ĉiun okazon ĝis nun. Tion ili faras nur por gajni tempon.
*Samaj landoj plurfoje dum la historio (1948, 1967, 1973) atakis Israelon. Tio estas pro klopodoj ekstermi/forviŝi la landon.
*(Ĝenerale oni povas vidi "sistemecon" en ĉiuj tiuj malbonaĵoj celataj kontraŭ Israelo. Laŭ mi tia sistemeco kontraŭ iu lando ne troviĝas aliloke; ekz. pluraj militoj kun samaj atakantoj kaj sama atakito, tiel grandskala kaj sistemigita terorado dum tiel longa tempo)
KRITIKO DE LA UNUŜTATA SOLVO
La de vi subtenata solvo estas iagrade bela, sed troviĝas laŭ mi tamen almenaŭ du gravaj mankoj en tiu solvo:
1) La solvo ne konsideras la fakton ke inter la palestinanoj troviĝas forta emo al teroro nek ĝi proponas iun ajn seriozan solvon al tiu problemo. Mi kompreneble ne diras ke ĉiuj palestinanoj estus teroristoj, sed mi diras ke inter ili troviĝas forta emo al tio. (Mi pensas ke ĉiuj militoj kaj konfliktoj en nia mondo estas finfine kaŭzitaj de relative eta grupo da homoj, sed la militemo de tiu grupo kaŭzas ke la plejmulto devas suferi, dum la plejmulto deziras vivi en paco kaj harmonio. Tiel estas certe ankaŭ en Israelo/la palestinaj teritorioj.)
Miaopinie la radiko al la konflikto estas ke la malamikoj de Israelo ne akceptas ian ajn judan ĉeeston en la Mezoriento. La teroremo inter la palestinanoj estas unu esprimiĝo de tio. La palestinanoj ne estas antropologie nekapablaj vivi en paco, sed ŝajnas ke ili ne povas memstare forigi la malhelpaĵon al paciĝo - nome la teroremo. Tial ili bezonas helpon en tiu kampo. Por monda paciĝo estis fondita organizaĵo nomata UN, sed la engaĝiĝo de tiu organizaĵo koncerne la forigon de la teroremo inter la palestinanoj egalas preskaŭ al nulo. Kiam miloj da grenadoj kaj raketoj estis pafataj en Israelon, ŝajnas ke la anoj de UN dormas. (Sed kompreneble ili vekiĝis la tagon kiam Israelo defendas sin....)
2) La intenco de Israelo estas ke tiu lando estus juda ŝtato. En la solvo oni tial devas konsideri tion. En la mondo troviĝas dudeko da kristanaj ŝtatoj kaj dudeko da muzulmanaj ŝtatoj. Tial estas tute pravigite ke ankaŭ troviĝus unu juda. Israelo kiel la hejmlando de la judoj estas grava kaj esenca elemento de la judaismo. Tion oni devas respekti. (Tio ankaŭ ne malebligas/ekskludas ke parto de la loĝantaro povus esti nejuda kaj esti plenvaloraj civitanoj de Israelo - kiel hodiaŭ troviĝas malplimultojn en Israelo kiujn la lando traktas tre bone, kvankam multfoje la malo estas asertata - false.)
La judoj malsimilas al ĉiuj aliaj popoloj en la mondo multaspekte. 1. Ili vivis disaj ĉirkaŭ la mondo dum du jarmiloj, sed ne kunfandiĝis kun la popoloj en la landoj kie ili vivis (tio devus esti unika fenomeno en la homa historio) 2. Ili daŭrigis fortajn ligojn al sia patrujo dum la tuta diasporo (ekz. la salutvorto "la sekvontan jaron en Jerusalemo!") 3. Ili estas la plej grandskale persekutata kaj mistraktata popolo (ankaŭ rilate tion la judoj devus esti unikaj).
Nu, krom tio, oni devas konsideri ke la popolo, la lando, la historio, la kulturo kaj la religio forte estas kunligitaj.
Laŭ mi tio entute endigas ke la judojn oni devas pritrakti surbaze tiuj siaj unikaj ecoj kaj plej grave estas ke ilia lando, historio, kulturo kaj religio estas ege respektendaj, samkiel respektendas la landoj, historio, kulturo kaj religio de ĉiuj aliaj popoloj.
Oni ankaŭ konsideru la mistraktadojn kaj persekutadojn de la judoj tra la historio kaj vidi ke pro tio ŝajnas ke ili eĉ ne estas lasitaj vivi en paco kaj harmonio en sia propra hejmlando. Do oni konsideru ke la situacio ne solveblas tiel facile. La kerno laŭ mi estas: kiel garantii ke la judoj povas vivi en paco kaj harmonio sur nia planedo? Kiel garantii ke la judoj povas vivi *NUN* en paco kaj harmonio sur nia planedo? (Eŭropo ja malsukcesegis en garantii la vivpovojn de la judoj. Granda hontindaĵo. Ĉu ni plisaĝiĝis? Se ni vere poras sendiskriminaciecon, demokratiecon kaj pacecon ni kiel eble plej multe devus kontraŭlabori ian ajn malamon kaj diskrimanacion de la judoj!!)
Konkludo:
Vi asertas ke la teroremo malaperus per kunigo de Israelo kaj la palestinaj teritorioj. Mi ne tiel pensas kaj akre kritikas tion. La israela formoviĝo el la Gaza-strio en jaro 2005 montras ke la teroristoj tro facile fortiĝas se ili ne estas malhelpataj. La celo de tiu formoviĝo estis ke la palestinanoj povus fondi propran ŝtaton. Anstataŭ la terororganizaĵo Hamas plifortiĝis en la Gaza-strio kaj sekve miloj da grenadoj kaj raketoj estis pafataj en Israelon. Tio montras ke la teroremuloj plifortiĝas tuj kiam ili havas la eblon plifortiĝi. Tio pruvas – laŭ mi – ke kunigo de Israelo kaj la palestinaj teritorioj tute ne eblas. Se la teroro tiel plifortiĝis post la israela formoviĝo el la Gaza-strio, oni tre facile povas determini ke kunigo de la palestinaj teritorioj kaj Israelo same kondukus al plifortiĝo de la terorismo kaj tio fariĝus tre granda minaco por la judoj. La teroristoj atakus la judojn kiel multe plej eble, se la teritorioj iĝus kunigitaj. Tial estas tute kaj plene neeble efektivigi tion antaŭ ol serioze prikonsideri la problemon kaj konsideri iun seriozan solvon al la problemo.
Fina grava atentigo:
Laŭ mi la judoj havas la rajton efektivigi sian kulturon, lingvon kaj religion en sia historia patrujo, samkiel multaj aliaj popoloj en nia mondo faris/faras.
Ekzistas danĝero ke oni troe pridubas tion rilate al la judoj, kompare kun aliaj popoloj. Kial? Ĉu tio estas juste kaj egale?
Se multaj aliaj popoloj jam efektivigis sian kulturon, sian lingvon kaj eble ankaŭ sian religion, tiel la judoj ankaŭ havas tiun rajton - sen troa pridubado de precize sia efektivigado de tiuj aferoj kompare kun aliaj popoloj.
Internaciaj pactrupoj starigu la ordon en la palestinaj teritorioj kaj forigu ĉiun ajn radikon kaj ĉiun ajn eblon (ekonomian – socian – materian) al plia terorado. Tio kompreneble okazu kun kiel eble plej malmulte da sangoverŝado. Oni devus plani tion tre bone kaj detale. Oni ankaŭ devus konsideri la malsimilaĵojn inter la Gaza-strio kaj Cisjordanio. La situacio ja estas pli komplika en la Gaza-strio. Oni devus enprezonigi tiujn kiuj laboras pri teroro, por malebligi ke ili ribelus.
Tio estus afero por la internacia komunumo kaj UN (kies engaĝo ĝis nun fakte egalas al nulo - miaopinie). Oni devus starigi ian novan registaron kaj ankaŭ starigi ĉiujn aliajn sociajn funkciojn, laŭeble kiel eble plej multe surbaze la jam ekzistantaj. Israelo tiam povus konstrui la sekuran vojon inter la Gaza-strio kaj Cisjordanio, kiun ili promesis al la palestinanoj enkadre de la pacpropono de jaro 2000. (Kiun la palestinaj estroj rufuzis – laŭkutime. Malbone estas tamen ke oni kulpigis Israelon ke tiu pacpropono estis malbona. Sed la palestinaj estroj estos – laŭ mi kaj Morris interalie – kontentaj nur la tagon kiam Mezoriento estas senjuda. Tial ilia daŭra rifuzado estas tre komprenebla. Kaj suferas la palestinanoj. Tutcerte. Sed ĉu vere pro la agadoj Israelaj? Ĉu ne pli verŝajne pro la indiferenteco de sia "registaro"?)
Aliuloj ne volas kompreni, sed nur komprenigi.
Sign-in to write a comment.